Другі рэгіянальны фестываль народных промыслаў і рамёстваў «Рамесная майстэрня» адбыўся 24 жніўня 2019 года на Краснапольшчыне.
Гэта свята працы сабрала майстроў з розных раёнаў Магілёўскай вобласці, а таксама ўсіх аматараў вялікай і шматграннай народнай культуры. Фестываль уключаў правядзенне выставы вырабаў майстроў народных промыслаў і рамёстваў, дэкаратыўна-прыкладнога мастацтва, майстар-класы па розных відах рамёстваў, практычную канферэнцыю і круглы стол па абмеркаванні праблем развіцця рамёстваў. Пагрузіць гледачоў у атмасферу ўзнікнення народных промыслаў і рамёстваў дапамагло дэфіле аўтэнтычных касцюмаў.
Адбылася работа сваеасаблівай творчай пляцоўкі для стасункаў майстроў паміж сабой, месца, дзе яны маглі дзяліцца сваім вопытам і перадаваць сваё майстэрства калегам і ўсім жадаючым.
Кожнаму чалавеку застаецца ў спадчыну тое, што стварылі талент і працалюбства бацькоў, продкаў, тое, што выяўляе нацыянальнае аблічча народа, яго душу, яго імкненні, тое, што кожнае пакаленне павінна шанаваць і вывучаць, таму мы павінны заўсёды захоўваць гэту спадчыну.
Метадыст метадычнага аддзела Краснапольскага РЦК Сазонава С.А.